ខុមហ្វ្រែល គឺជាគណៈកម្មាធិការ ឯករាជ្យ អព្យាក្រិត្យមិនរកកំរៃ និងមិនទទួលឥទ្ធិពលពីគណបក្សនយោបាយ និងរាជរដ្ឋាភិបាលតាំងតែពីការបោះឆ្នោត ខែឧសភា ឆ្នាំ១៩៩៣ ដែលរៀបចំឡើងដោយអ៊ុនតាក់ ក្រុមការងារអង្គការសិទ្ធិមនុស្សដំបូងមួយបានផ្តល់នូវក្រុមអ្នកសង្កេតការណ៍ឯករាជ្យ ក្នុងស្រុករាប់ពាន់នាក់ ដើម្បីសង្កេត និងអប់រំការបោះឆ្នោត។
មកដល់ឆ្នាំ ១៩៩៤ «ក្រុមការងារ» នៃអង្គការសិទ្ធិមនុស្សនេះ បានសំរេចបង្កើត គណៈកម្មាធិការដើម្បីការបោះឆ្នោត ជាអចិន្រ្តៃនៅកម្ពុជា។
ឆ្នាំ ១៩៩៧ ខុមហ្វ្រែល ត្រូវបានចុះនៅក្នុង បញ្ជីឈ្មោះអង្គការក្រៅរដ្ឋាភិបាល ដែលអនុញ្ញាត ដោយក្រសួងមហាផ្ទៃ និងត្រូវបានទទួលស្គាល់ ពីគណៈកម្មាធិការជាតិរៀបចំការបោះឆ្នោតជា គណៈកម្មាធិការមួយ ក្នុងចំណោម អង្គការឃ្លាំមើលការបោះឆ្នោតដែលផ្តល់អទិភាពជាអ្នកសង្កេតការណ៍បោះឆ្នោត។ ក្នុងដំណាក់កាលនោះ ខុមហ្វ្រែលបានរៀបចំអ្នកសង្កេតការណ៍ ស្ម័គ្រចិត្ត មានចំនួនប្រមាណច្រើនជាង ១៥,០០០ នាក់ ដោយធ្វើការអប់រំអ្នកបោះឆ្នោត សង្កេតការ ចុះឈ្មោះបោះឆ្នោត ថ្ងៃបោះឆ្នោត និងផ្ទៀងផ្ទាត់ការរាប់សន្លឹកឆ្នោត (លទ្ធផលបោះឆ្នោត) នៅទូទាំងប្រទេស។
រហូតមកទល់បច្ចុប្បន្ន ខុមហ្វ្រែលមានអង្គការសមាគមចំនួន ១០ ជាសមាជិក ដូចជាសមាគមអាដហុក មជ្ឈមណ្ឌលកម្ពុជាដើម្បីការពារសិទ្ធិកុមារ ក្រុមអ្នកច្បាប់ ការពារសិទ្ធិកម្ពុជា អង្គការកម្ពុជា ដើម្បីជួយស្រ្តីមានវិបត្តិ អង្គការរក្សាការពារ សិទ្ធិមនុស្ស នៃកម្ពុជា សមាគមការពារសិទ្ធិមនុស្សខ្មែរកម្ពុជាក្រោម សមាគមយុវជនខ្មែរ ជំនួយផ្នែកច្បាប់នៃកម្ពុជា និងបជ្ឈមណ្ឌលព័ត៌មានស្រ្តីកម្ពុជា។
