តំណាងអ្នកដឹកនាំខុមហ្រ្វែល
លោក សុក សំអឿន ប្រធានគណៈកម្មាធិការនាយក លោក យង់ គិមអេង អនុប្រធានគណៈកម្មាធិការនាយក លោក គឹម ឈន នាយកប្រតិបត្តិប្រវត្តិសង្ខេប
គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្រ្វែល) គឺជាអង្គការមិនមែនរដ្ឋាភិបាលឯករាជ្យ អព្យាក្រឹត្យមួយ ដែលត្រូវបានបង្កើតឡើងក្នុងខែធ្នូ ឆ្នាំ១៩៩៥ ដោយអង្គការសិទ្ធិមនុស្ស ដូចជាសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) ។
ខុមហ្វ្រែលត្រូវបានចុះនៅក្នុងបញ្ជីឈ្មោះជាអង្គការមិនមែនរដ្ឋាភិបាលដោយក្រសួងមហាផ្ទៃក្នុងខែធ្នូ ឆ្នាំ១៩៩៧។ ចាប់តាំងពីការបោះឆ្នោត ឆ្នាំ១៩៩៨មក ខុមហ្វ្រែលត្រូវបានទទួលស្គាល់ដោយគណៈកម្មាធិការជាតិរៀបចំការបោះឆ្នោត (គ.ជ.ប) ។ ក្នុងការបោះឆ្នោតនីមួយៗចាប់ពី ឆ្នាំ១៩៩៨ ដល់ ឆ្នាំ២០១៧ ខុមហ្វ្រែលបានបណ្តុះបណ្តាល និងដាក់ពង្រាយអ្នកស្ម័គ្រចិត្តជាង ១ម៉ឺននាក់ ដើម្បីសង្កេតមើលការបោះឆ្នោត និងរាប់សន្លឹកឆ្នោតនៅកម្ពុជា ។ សម្រាប់ការបោះឆ្នោត ឆ្នាំ២០២២ អ្នកសង្កេតការណ៍ ចំនួន១,៨៥៨នាក់ ត្រូវបានដាក់ពង្រាយ ហើយ ចំនួន៥,០៣៦នាក់ សម្រាប់ឆ្នាំ២០២៣ ។
បទពិសោធន៍របស់ខុមហ្វ្រែល
សមត្ថភាព និងបទពិសោធន៍របស់ខុមហ្រ្វែល ត្រូវបានចាក់ឫសយ៉ាងជ្រៅនៅក្នុងប្រវត្តិនៃការតស៊ូមតិ ការសិក្សាផ្នែកច្បាប់ ផលិតនិងផ្សព្វផ្សាយកិច្ចពិភាក្សាតាមវិទ្យុ និងតាមប្រព័ន្ធផ្សព្វផ្សាយសង្គម ការឃ្លាំមើល ការធ្វើសវនកម្ម ការសង្កេតការណ៍ និងជំនាញក្នុងការប្រមូលទិន្នន័យ និងការវិភាគទាក់ទងនឹងការគ្រប់គ្រងការបោះឆ្នោត ការចុះឈ្មោះបោះឆ្នោត និងការអនុវត្តការងាររបស់រដ្ឋសភា និងរដ្ឋាភិបាល ។
ខុមហ្រ្វែលមានកំណត់ត្រាល្អនៅក្នុងឃ្លាំមើលរដ្ឋាភិបាល ឃ្លាំមើលរដ្ឋសភា និងផលិតរបាយការណ៍ប្រជាធិបតេយ្យប្រចាំឆ្នាំ ។ របាយការណ៍ទាំងនេះត្រូវបានទទួលស្គាល់ទាំងសហគមន៍ជាតិ និងអន្តរជាតិ។ ខុមហ្វ្រែលក៏មានទំនាក់ទំនងល្អជាមួយគណៈកម្មាធិការជាតិរៀបចំការបោះឆ្នោត (គ.ជ.ប) ក្នុងអំឡុងពេលបំពេញសកម្មភាពគម្រោង និងបានជួយលើកំណែទម្រង់បញ្ជីបោះឆ្នោត រួមទាំងបទបញ្ជានិងនីតិវិធីនៃការចុះឈ្មោះបោះឆ្នោត និងការធ្វើបច្ចុប្បន្នភាពបញ្ជីបោះឆ្នោតផងដែរ ។ តាមរយៈការទទួលស្គាល់ និងការសហការជាអន្តរជាតិ ខុមហ្រ្វែលបានសម្របវិធីសាស្រ្តរបស់ខ្លួនជាមួយនឹងការអនុវត្តល្អបំផុតជាសកល ដោយធានាថា កម្មវិធីរបស់ខ្លួនមានប្រសិទ្ធភាព និងប្រសិទ្ធផល ។
ខុមហ្រ្វែល គឺជាសមាជិកនៃបណ្តាញអាស៊ីសម្រាប់ការបោះឆ្នោតដោយសេរី (ANFREL) ដែលមានមូលដ្ឋាននៅទីក្រុងបាងកក ប្រទេសថៃ ។ ខុមហ្រ្វែលបានចូលរួមសកម្មភាពជាមួយ ANFREL រួមទាំងបេសកកម្មសង្កេតការណ៍ជាអន្តរជាតិ ដើម្បីសង្កេតមើលការបោះឆ្នោតក្នុងប្រទេសមួយចំនួនក្នុងទ្វីបអាស៊ី ។ ខុមហ្រ្វែលបានគាំទ្រសេចក្តីប្រកាសទីក្រុងបាងកក ស្តីពីការបោះឆ្នោតដោយសេរី និងយុត្តិធម៌ ។
ខុមហ្រ្វែលត្រូវបានទទួលស្គាល់ថា ជាសមាជិកនៃបណ្តាញសកលនៃអ្នកឃ្លាំមើលការបោះឆ្នោតក្នុងស្រុក (GNDEM) និងបានគាំទ្រលើសេចក្តីប្រកាសនៃគោលការណ៍សកលសម្រាប់ការសង្កេត និងតាមដានការបោះឆ្នោតដោយមិនប្រកាន់បក្សពួកដោយអង្គការប្រជាពលរដ្ឋ ។
ទស្សនវិស័យ
សង្គមប្រជាធិបតេយ្យមួយនៅកម្ពុជាដែលនាំមកនូវផលប្រយោជន៍ដល់ប្រជាពលរដ្ឋ ។
បេសកកម្ម
ខុមហ្រ្វែលជាអង្គការមិនមែនរដ្ឋាភិបាលអព្យាក្រឹត មានបេសកកម្មពង្រឹងសិទ្ធិអំណាចប្រជាពលរដ្ឋកម្ពុជាក្នុងការអនុវត្តសិទ្ធិរបស់ពួកគេក្នុងវិស័យនយោបាយ និងការធ្វើសេចក្តីសម្រេចចិត្ត តាមរយៈកម្មវិធីអប់រំពលរដ្ឋ ការសង្កេតឃ្លាំមើល និងការចូលរួមផ្ដល់គំនិតស្ថាបនាដល់រដ្ឋាភិបាល និងមន្ត្រីជាប់ឆ្នោត ឱ្យមានការកំណែទម្រង់គោលនយោបាយ លទ្ធិប្រជាធិបតេយ្យ ការបោះឆ្នោតដោយសេរី និងយុត្តិធម៌ និងគណនេយ្យភាពបែបប្រជាធិបតេយ្យ ។
ទិសដៅយុទ្ធសាស្ត្រ ២០២៤ - ២០២៨
១- ពង្រឹងការចូលរួមរបស់ពលរដ្ឋ និងការអប់រំអ្នកបោះឆ្នោត ៖ ដើម្បីបង្កើនការយល់ដឹង និងការចូលរួមនៅក្នុងដំណើរការប្រជាធិបតេយ្យ ដោយផ្តោតលើស្ត្រី យុវជន និងក្រុមងាយរងគ្រោះ ។
២- ធ្វើឱ្យប្រសើរឡើងនៃការបោះឆ្នោតដោយសេរី ត្រឹមត្រូវ និងតម្លាភាព ៖ ដើម្បីបង្កើនទំនុកចិត្តក្នុងដំណើរការបោះឆ្នោត តាមរយៈការត្រួតពិនិត្យ និងការតស៊ូមតិគ្រប់ជ្រុងជ្រោយសម្រាប់កំណែទម្រង់ការបោះឆ្នោត ។
៣- ពង្រឹងសង្គមស៊ីវិលដែលមានភាពធន់ និងបង្កើតបណ្តាញសម្រាប់ការពង្រឹងយន្តការរាយការណ៍ អំពីការរំលោភសិទ្ធិមនុស្ស និងគណនេយ្យភាពប្រជាធិបតេយ្យ ។
៤- លើកកម្ពស់សមភាពយេនឌ័រ និងការចូលរួមរបស់ស្ត្រីក្នុងវិស័យនយោបាយ ៖ ដើម្បីបង្កើនចំនួនតំណាងស្ត្រីក្នុងថ្នាក់សម្រេចចិត្តកាន់តែច្រើន និងចូលរួមក្នុងដំណើរការនយោបាយ ។
៥- ពង្រឹងសមត្ថភាពរបស់ស្ថាប័ន ៖ បង្កើនប្រសិទ្ធភាពការងាររបស់ស្ថាប័ន តាមរយៈការអភិវឌ្ឍសមត្ថភាពបុគ្គលិក ការវាយតម្លៃ និងការលើកទឹកចិត្ត ។
សកម្មភាពចម្បងៗរបស់ខុមហ្រ្វែល ឆ្នាំ២០២៤ ដល់ ឆ្នាំ២០២៨
១. សង្កេតការណ៍បោះឆ្នោត - បណ្តុះបណ្តាល និងដាក់ពង្រាយអ្នកសង្កេតការណ៍ ដើម្បីសង្កេតដំណើរការចុះឈ្មោះបោះឆ្នោតនិងធ្វើសវនកម្មលើបញ្ជីបោះឆ្នោត ។ - បណ្តុះបណ្តាល និងដាក់ពង្រាយអ្នកសង្កេតការណ៍រយៈពេលវែង និងរយៈពេលខ្លី ដើម្បីសង្កេតដំណើរការបោះឆ្នោត និងការរាប់សន្លឹកឆ្នោតលឿន (parallel vote tabulation) ។ - ធ្វើការស្ទង់មតិរហ័សលើការពេញចិត្តរបស់អ្នកបោះឆ្នោតបន្ទាប់ពីការបោះឆ្នោតភ្លាមៗ ។ ២. ការតស៊ូមតិ និងការបញ្ចុះបញ្ចូលសម្រាប់កំណែទម្រង់ការបោះឆ្នោត និងសមភាពយេនឌ័រក្នុងវិស័យនយោបាយ - ធ្វើការពិគ្រោះយោបល់ វេទិកា កិច្ចពិភាក្សាតុមូល និងសិក្ខាសាលា ដើម្បីជំរុញកិច្ចសន្ទនា ស្តីពីកំណែទម្រង់ការបោះឆ្នោតនិងលទ្ធិប្រជាធិបតេយ្យ និងបញ្ហាសមភាពយេនឌ័រ និងលើកកម្ពស់ការចូលរួមសាធារណៈ ។ - បង្កើតអនុសាសន៍ និងរៀបចំកិច្ចប្រជុំពិភាក្សាសម្រាប់ការផ្លាស់ប្តូរជាវិជ្ជមាននៃច្បាប់ ស្ដីពីគណបក្សនយោបាយ ច្បាប់និងនីតិវិធីបោះឆ្នោត និងបទប្បញ្ញត្តិ គោលនយោបាយដោយផ្អែកលើការពិនិត្យផ្លូវច្បាប់ និងមតិរបស់ភាគីពាក់ព័ន្ធ ។ - សហការជាមួយអង្គការសង្គមស៊ីវិល ស្ថាប័នអន្តរជាតិ និងសហគមន៍មូលដ្ឋាន ដើម្បីពង្រឹងកិច្ចខិតខំប្រឹងប្រែងលើការងារតស៊ូមតិ។ ៣. កម្មវិធីសំឡេងសង្គមស៊ីវិល និងព័ត៌មានចម្រុះ ផលិត និងផ្សព្វផ្សាយកិច្ចពិភាក្សាតាមវិទ្យុ និងតាមប្រព័ន្ធផ្សព្វផ្សាយសង្គម (Facebook, YouTube, TikTok, Telegram) រួមទាំងកិច្ចសន្ទនាខ្លី និងវីដេអូជីវចល។ ៤. ឃ្លាំមើលលទ្ធិប្រជាធិបតេយ្យ និងរដ្ឋសភា - សង្កេត និងធ្វើរបាយការណ៍ពីលទ្ធផលការងាររបស់រដ្ឋសភា និងតំណាងរាស្ត្រ ។ - ផលិត និងផ្សព្វផ្សាយអត្ថបទសង្ខេបប្រចាំសប្តាហ៍ អំពីលទ្ធិប្រជាធិបតេយ្យ និងការបោះឆ្នោត ។ - ផលិត និងផ្សព្វផ្សាយរបាយការណ៍ប្រចាំឆ្នាំ ស្តីពីលទ្ធិប្រជាធិបតេយ្យ ។ - សង្កេតការអនុវត្តការងាររបស់ក្រុមប្រឹក្សាឃុំ សង្កាត់ ។ ៥. ឃ្លាំមើលយេនឌ័រផ្នែកនយោបាយ និងបណ្តុះបណ្តាលសកម្មជននយោបាយស្ត្រី - សង្កេត ឃ្លាំមើលការអនុវត្តការងាររបស់មន្ត្រីជាប់ឆ្នោតជាស្ត្រី ទាំងក្រុមប្រឹក្សាឃុំ សង្កាត់ និងសភា និងការចូលរួមរបស់ស្ត្រីក្នុងវិស័យនយោបាយ ។ - សង្កេតការចូលរួមនយោបាយរបស់ស្ត្រីក្នុងដំណើរការបោះឆ្នោត និងការស្ទង់មតិជាមួយអ្នកបោះឆ្នោតស្ត្រី ។ - បណ្តុះបណ្តាលសកម្មជននយោបាយជាស្ត្រី បេក្ខជនស្ត្រី អំពីការផ្តល់អំណាចដល់ស្ត្រីក្នុងវិស័យនយោបាយ និងថ្នាក់សម្រេច ចិត្ត ។
