អង្គការខុមហ្វ្រែល រៀបចំកិច្ចពិភាក្សា លើអនុសាសន៍ទាក់ទិនការបោះឆ្នោត

នៅថ្ងៃទី២៨ ខែមេសា ឆ្នាំ២០២៥ គណៈកម្មាធិការដើម្បីការបោះឆ្នោតដោយសេរី និងយុត្តិធម៌ ហៅកាត់ ខុមហ្រ្វែល បានរៀបចំកម្មវិធីកិច្ចពិភាក្សា លើអនុសាសន៍ទាក់ទិនកំណែទម្រង់ការបោះឆ្នោត នៅឯសណ្ឋាគារ ខេមបូឌីយ៉ាណា មានអ្នកចូលរួមសរុបចំនួន ២៧នាក់ (ស្រី្ត ៥នាក់) ក្នុងនោះមានអ្នកតំណាងមកពីគណបក្សនយោបាយ ចំនួន ៨ស្ថាប័ន (គណបក្សនយោបាយដែលមានអាសនៈក្នុងក្រុមប្រឹក្សា រដ្ឋសភា និងព្រឹទ្ធសភា) ក្នុងចំណោមគណបក្សនយោបាយចំនួន ១១ស្ថាប័នដែលបានអញ្ជើញ ។

អនុសាសន៍ដែលបានដាក់ឱ្យពិភាក្សានេះ មានចំនួន ១២ចំណុច បានមកពីសិក្ខាសាលាចំនួន​ ១២ខេត្ត និងសិក្ខាសាលាថ្នាក់ជាតិមួយ ដែលភាគីពាក់ព័ន្ធបានស្នើសុំ និងសុំឱ្យមានការកែលម្អក្នុងការអនុវត្តក្នុងដំណើរការបោះឆ្នោតទៅខាងមុខទៀត ។

លទ្ធផលនៃកិច្ចពិភាក្សា អ្នកតំណាងគណបក្សនយោបាយនីមួយៗ បានបញ្ចេញមតិ យោបល់ និងដាក់ធាតុចូលរបស់ខ្លួនក្នុងសេចក្តីព្រាងចុងក្រោយលើចំណុច​ ព័ត៌មានចំនួន ៤ គឺ ១) អនុសាសន៍ ២) មូលហេតុ ៣) វិធីសាស្រ្ត/សកម្មភាព ៤) និងតួអង្គទទួលខុសត្រូវ ។ ខុមហ្វ្រែល នឹងបន្តកែសម្រួលខ្លឹមសារ និងចែកជូនដល់ភាគីពាក់ព័ន្ធការបោះឆ្នោត ក្រោយកែសម្រួលជាឯកសារចុងក្រោយ ។

រូបភាពខាងក្រោម ជាសកម្មភាពក្នុងកិច្ចពិភាក្សា នៅសណ្ឋាគារខេមបូឌីយ៉ាណា ។