វគ្គបណ្តុះបណ្តាលចងក្រងក្រុម បណ្តាញអប់រំអ្នកបោះឆ្នោត

កាលពីថ្ងៃទី១៣ ដល់ ១៥ ខែតុលា ឆ្នាំ២០២៥ គណៈកម្មាធិការដើម្បីការបោះឆ្នោតដោយសេរី និងយុត្តិធម៌ ហៅកាត់ ខុមហ្រ្វែល បានរៀបចំវគ្គបណ្តុះបណ្តាលមួយ មានអ្នកចូលរួម​សរុបចំនួន ២៥នាក់មកពី ១០ឃុំ ក្នុងខេត្តចំនួន ៥ រួមមាន ខេត្តសៀមរាប ខេត្តកំពង់ឆ្នាំង ខេត្តកំពង់ចាម ខេត្តកំពត និងខេត្តព្រះវិហារ ។ ការបណ្តុះបណ្តាលនេះ ដើម្បីឱ្យប្រជាពលរដ្ឋនៅក្នុងសហគមន៍ ចេះចងក្រងក្រុម ឬបណ្តាញអប់រំអ្នកបោះឆ្នោត និងប្រែក្លាយអ្នកបោះឆ្នោតដែលបានបណ្តុះបណ្តាលនោះ ជាអ្នកដែលមានជំនាញ ការយល់ដឹងច្បាស់លាស់ និងមានលទ្ធភាពក្នុងការចែករំលែកព័ត៌មាននៅក្នុងក្រុម ឬបណ្តាញរបស់ពួកគេ ទាក់ទងជាមួយការបោះឆ្នោត​ដូចជា វិធីសាស្រ្តចងក្រងបណ្តាញអប់រំអ្នកបោះឆ្នោត គោលការណ៍បោះឆ្នោតដោយសេរី និងយុត្តិធម៌ និងប្រជាធិបតេយ្យ និងការបោះឆ្នោត និងរបៀបសង្កេតការណ៍ផ្សេងៗ ទៀត ដែលនឹងរៀបចំពង្រឹងជាបន្តបន្ទាប់ សម្រាប់ការចូលរួមសង្កេតការណ៍ដំណើរការបោះឆ្នោតឃុំ សង្កាត់ឆ្នាំ២០២៧ និងការបោះឆ្នោតថ្នាក់ជាតិឆ្នាំ២០២៨ ខាងមុខ ។
បន្ថែមលើចំណុចដែលបានរៀបរាប់ខាងលើ សិក្ខាកាមក៏បានផ្តល់ជូនពួកគេជាមួយនឹង ការសាកល្បងចំណេះដឹងមុន និងក្រោយវគ្គ របៀបរៀបចំក្នុងការចែករំលែកបន្តទៅសមាជិកក្រុម ឬបណ្តាញអប់រំអ្នកបោះឆ្នោតផងដែរ ។
ជាលទ្ធផលបានបង្ហាញថា ក្រោយពីវគ្គបណ្តុះបណ្តាលរយៈពេល​ ៣ថ្ងៃ សិក្ខាកាមបានបង្ហាញពីកម្រិតយល់ដឹងរបស់ពួកគេកើនឡើងតាមរយៈការសាកល្បងបំពេញសំណួរក្រោយវគ្គ ការសាកសួរ និងការជជែកពិភាក្សា រួមទាំងត្រៀមខ្លួនចូលរួម សង្កេតដំណើរការបោះឆ្នោតនាពេលខាងមុខ ។